Upat ka indibidwal, lakip ang usa ka menor de edad, ang nasamdan human sa insidente sa pagpamusil nga nahitabo gabii sa Abril 6, 2026, sa Purok 8, Sitio Mabuhay, Barangay San Jose, Malaybalay City, Bukidnon

Ang maong panghitabo nakapukaw og kahadlok sa komunidad samtang ang mga biktima dali nga gidala sa Bukidnon Provincial Medical Center (BPMC) sa Barangay Casisang alang sa pagpatambal.

Sumala sa police report, ang mga biktima mao ang usa ka 45-anyos nga lalaki nga naigo sa tuong bukton, usa ka 41-anyos nga babaye nga naigo sa tangkugo, usa ka 30-anyos nga babaye nga naigo sa wala nga sampot, ug usa ka lalaking menor de edad nga naigo sa tuo nga paa.

Base sa ilang asoy, nagtapok sila daplin sa barangay road mga alas 9:00 sa gabii ug nag-estoryahay sa dihang nakadungog sila og unang buto sa armas nga ilang wala dayon hatagi og pagtagad. Apan sa sunod nga pagpabuto, nasamdan na sila tungod sa giingong improvised nga armas nga naggamit og buckshot ammunition, base sa pellet-type nga samad nga ilang naangkon.

Gikataho usab nga adunay nag-una nga panaglalis tali sa mga silingan sa maong lugar sa miaging gabii, nga giisip karon nga usa sa posibleng hinungdan sa insidente.

Padayon ang imbestigasyon sa Malaybalay City Police Station (MCPS) aron mailhan ug madakpan ang responsable nga suspek o mga suspek, samtang ginapanawagan ang kooperasyon sa komunidad alang sa dali nga pagsulbad sa maong kaso. (melbmadera)