Usa ka 65-anyos nga lalaki ang midunggab sa iyang 34-anyos nga anak nga lalaki ug sa iyang 54-anyos nga asawa human sa usa ka kagubot sulod sa ilang panimalay sa Barangay Kiraon, Damulog, Bukidnon, niadtong gabii sa Enero 12, 2026

Sumala sa report ni Police Captain Marlon C. Subrian, OIC sa Damulog Municipal Police Station (MPS), ang kagawad sa Barangay Kiraon kauban ang Barangay Peacekeeping Action Team (BPAT) personal nga mipatim-aw sa Damulog MPS aron i-turn over ang suspek.

Sa inisyal nga imbestigasyon, nasayran nga ubos sa impluwensya sa ilimnong makahubog ang suspek ug ang iyang anak sa wala pa mahitabo ang insidente. Nagkainit ang panaglalis sulod sa ilang pinuy-anan tungod sa manok panabong sa suspek, nga giingong giparang sa anak ngadto sa mas edaran nga manok.

Atol sa komprontasyon, giingong gikulata sa anak ang suspek, hinungdan nga gikuha sa amahan ang hunting knife nga anaa sa ibabaw sa lamesa ug gidunggab ang tiyan sa iyang anak. Sa dihang misulay pagpanghilabot ug pagpahupay sa sitwasyon ang asawa, gidunggab usab siya sa suspek.

Ang duha ka biktima daling gidala sa Bukidnon Provincial Hospital. Apan ikasubo, ang asawa gideklarar nga dead on arrival, samtang ang anak, kinsa anaa sa kritikal nga kahimtangan, nakabsan usab sa kinabuhi niadtong buntag sa Enero 14, 2026, sumala sa report sa XFM.

Ang suspek anaa na karon sa kustodiya sa Damulog MPS alang sa tukmang disposasyon ug pagpasaka sa kasong parricide. (melbmadera)