Pormal nga nakig-uyon ang Lokal nga Panggamhanan sa Valencia sa Department of Agriculture – Regional Field Office 10 (DA-RFO 10) pinaagi sa usa ka Memorandum of Agreement (MOA) signing ceremony alang sa proyektong farm machinery and equipment

Ang kasabotan nga gipirmahan niadtong Enero 13, 2026, nagkantidad og ₱12.7 million. Sumala sa Facebook post sa kagamhanang lokal, tinguha sa maong programa nga mapadali ug mapamoderno ang pagpanguma sa dakbayan.

Gikataho nga ilalom sa maong proyekto nga gipondohan sa DA, lakip sa mga paliton ang forklift, hauling truck, four-wheel-drive tractor, ug rice combine harvester. Ang maong mga ekipo magserbisyo ug maghatag og benepisyo sa lokal nga panggamhanan ug sa mga mag-uuma, ilabina sa mga giilang benepisyaryo nga farmers’ irrigators associations sa dakbayan.

Mitambong sa pirmahanay si DA-RFO 10 Regional Executive Director Jose Apollo Y. Pacamalan, City Agricultural and Biosystems Engineering Head Engr. Fidel M. Parian, ug Atty. Heinz Guderian Villanueva isip representante ni Mayor Azucena “Amie” Galario. Kauban usab nila si City Accountant Kenth Philip Marcos aron pormal nga maselyohan ang panag-uyon, sa presensya ni Clementino Esto Jr., ang OIC–City Agriculturist.

Pinaagi niining mga makinarya, gilauman nga mas mapauswag ang mekanisasyon sa pag-ani, maminusan ang gasto sa produksyon, ug mas mapataas ang kita sa mga lokal nga mag-uuma sa Dakbayan sa Valencia.(melbmadera)