Gitigbas-patay ang usa ka 38-anyos nga lalaki sa Purok 5, Sityo Layungon, Barangay Pongol, Libona, hapon sa Mayo 11, 2026, sumala sa report sa Libona Municipal Police Station

Gitigbas-patay ang usa ka 38-anyos nga lalaki sa Purok 5, Sityo Layungon, Barangay Pongol, Libona, hapon sa Mayo 11, 2026, sumala sa report sa Libona Municipal Police Station.

Ang biktima napalgang nagahigda sa pineapple field road ug nakaangkon og grabeng samad sa wala nga abaga, ulo, ug dughan tungod sa pagpanigbas.

Sa inisyal nga imbestigasyon, nasayran nga ang biktima, nga giingong hubog, malisyosong miguba sa usa ka solar Bluetooth speaker ug nakadaot usab sa atop sa balay sa suspek.

Nahitabo ang komprontasyon tali sa duha ka partido sa dihang nahiabot ang suspek.

Ang amahan sa biktima misulay pa unta sa pagpakalma sa sitwasyon, apan misangpot gihapon sa mainit nga panagbangi.

Sa kainit sa argumento, gisuntok sa biktima ang 42-anyos nga suspek, hinungdan nga nanigbas ang naulahi gamit ang sanggot.

Gidala pa sa ospital ang biktima, apan gideklarang dead on arrival sa wala pa makaabot.

Ang suspek boluntaryong mitahan sa barangay kapitan sa Barangay Pongol human sa insidente.

Karon, ang suspek ug ang gamit nga sanggot nga gigamit sa krimen anaa na sa kustodiya sa Libona Municipal Police Station alang sa tukmang dokumentasyon ug disposisyon. (melbmadera)