Usa ka 39-anyos nga lalaki ang nakigpinusilay sa police team gikan sa Provincial Intelligence Unit ug Maramag Municipal Police Station nga nag-serve sa search warrant kalabot sa paghupot og armas niini didto sa Brgy. Dologon, Maramag, Bukidnon

Sumala sa report sa Information Section sa Bukidnon Police Provincial Office (BPPO), nahitabo kini buntag sa Disyembre 7, 2025.

Ang kapolisan mag-serve unta og search warrant sa panimalay sa suspek kalabot sa kalapasan sa Comprehensive Firearms and Ammunition Regulations Act.

Apan nidagan ang mag-uumang suspek ug nakigpinusilay sa kapolisan gamit ang kalibre .45 nga pistola.

Resulta, samaran siya ug gidala sa Bukidnon Provincial Hospital sa Maramag, Bukidnon.

Nakuha sa kapolisan gikan sa panimalay sa suspek ang usa ka Steel Magazine sa M16 assault rifle, lima ka 5.56 live ammunition, usa ka Digital pocket scale kolor itum, usa ka inside holster sa short caliber pistol color green nga adunay US brand name, usa ka improvised tube tooter color black, upat ka assorted lighters, ug walo ka improvised aluminum foil strips.

Dugang pa, pistola ug tanang nakumpiska nga ebidensya ang ubos sa pagtipig sa Bukidnon Provincial Forensic Unit alang sa dugang imbestigasyon ug saktong disposisyon. (Diego M. Hidalgo)