Gidunggab sa usa ka amahan ang iyang 23-anyos nga anak nga lalaki human kini miaparta sa away sa iyang mga ginikanan gabii sa Marso 2, 2026, sa Purok 7, Sitio Manubiray, Barangay Lampanusan, Kalilangan, Bukidnon

Ang biktima gisakay sa Patient Transport Vehicle (PTV) sa barangay ug gidala sa Bukidnon Provincial Hospital sa Kalilangan tungod sa samad dinunggaban sa tuo nga ibabaw nga lateral nga bahin sa iyang gusok.

Sa inisyal nga imbestigasyon, nasayran nga ang 52-anyos nga suspek ubos sa impluwensya sa makahubog nga ilimnon ug nakiglalis sa iyang asawa sulod sa ilang pinuy-anan. Ang biktima misulod aron unta pahupayon ang kagubot tali sa iyang mga ginikanan, apan kalit siyang gidunggab sa suspek.

Nasikop sa mirespondeng mga personnel ang suspek ug gidala sa Kalilangan Municipal Police Station alang sa hustong disposisyon.

Sumala sa kapolisan, ang motibo sa insidente nag-ugat sa wala pagsinabtanay sulod sa pamilya. Padayon ang imbestigasyon sa maong hitabo. (melbmadera)