Nasakmit ang gidudahang shabu nga nagkantidad og ₱27,000.00 ug usa ka caliber .38 revolver nga adunay tulo ka live bullets sa gipahigayon nga raid sa hiniusang puwersa sa kapolisan sa Purok 1, Barangay 9, Malaybalay City, Bukidnon hapon sa Pebrero 27, 2026

Malampusong gipatuman sa joint police operation ang Search and Seizure Warrant Order No. RTC-OCC 08-26 nga pinetsahan og Pebrero 24, 2026 batok kang Faisal Gumpal Patara, 30, driver ug residente sa maong lugar.

Ang hapsay nga pagpangita ug pag-imbentaryo sa mga nasakmit nga ebidensiya nasaksihan sa presensya sa mga Barangay Elected Officials sa Barangay 9, sumala sa police report.

Ang dinakpan, uban sa mga nakumpiskang butang, gidala sa Malaybalay City Police Station alang sa dokumentasyon ug hustong disposisyon.

Human niini, ang nakumpiskang armas ug mga bala gitugyan ngadto sa Bukidnon Provincial Forensic Unit alang sa ballistic ug laboratory examination, samtang ang urine sample nga gikuha gikan sa suspek gisumiter alang sa drug test examination.

Kaso sa paglapas sa Republic Act No. 10591 o Comprehensive Firearms and Ammunition Regulation Act ug Section 11 sa Republic Act No. 9165 o Comprehensive Dangerous Drugs Act of 2002 ang giandam batok sa suspek.

Ang raiding team gilangkuban sa personnel sa Malaybalay City Police Station kauban ang Bukidnon 1st Provincial Mobile Force Company, sa koordinasyon sa Bukidnon Provincial Intelligence Unit. (melbmadera)