Giila ang Malaybalay City, Bukidnon, isip usa ka Outstanding Local Government Unit Implementer sa Department of Social Welfare and Development (DSWD) Social Pension Program for Indigent Senior Citizens (SPISC)

Sumala sa Facebook post sa DSWD Northern Mindanao, kini nahitabo atol sa 2025 SocPen Parangal nga gipahigayon sa Puerto Princesa, Palawan kaniadtong Oktubre 16, 2025.

Ilalom sa Transfer of Funds scheme, gipakita sa siyudad ang talagsaong pagsunod sa pag-apod-apod ug pag-liquidate sa pondo nga gitudlo para sa mga indigent elderly beneficiaries.

Labaw pa sa simpleng pagsunod, dugay na nga gipakita sa Malaybalay ang dedikasyon sa kaayohan sa mga senior citizens.

Sa sayong bahin pa sa 2005, unom ka tuig sa wala pa ang nasudnong implementasyon sa SPISC program, ang siyudad nagahatag na og pensiyon sa mga senior citizens nga 70-anyos pataas.

Ang Malaybalay usab nagpasulong sa integrated nga serbisyo para sa mga tigulang, kauban ang lain-laing ahensya aron maghatag og healthcare, wellness programs, bakuna, livelihood training, ug social support.

Gitukod sa siyudad ang unang Senior Citizens Community Care Center sa Mindanao, nga nagsilbing sentro alang niini nga mga inisyatibo. (melbmadera)