Kaniadtong Oktubre 20, 2025, ang mga empleyado sa Local Government Unit (LGU) sa Valencia City gipaubos sa random drug testing

Sumala sa social media post sa LGU-Valencia, ang kalihokan gipahigayon sa Covered Court sa Valencia City Hall.

Ang kalihokan kabahin sa pagpatuman sa Drug-Free Workplace Policy ubos sa Ordinance No. 120-2024, nga nagtumong sa pagpreserba sa kaluwasan, disiplina, ug integridad sa tanang kawani sa lokal nga pangagamhanan.

Gisuportahan kini sa Drug-Free Workplace Committee nga gipangulohan ni Mayor Amie Galario.

Personal nga miapil sa drug test sila Mayor Galario, Vice Mayor Griezl Galario-Fernandez, ug mga konsehal isip pamatood sa ilang tinuoray nga paningkamot ug ehemplo sa maayong pamunuan.

Sa iyang mensahe, gipasiugda ni Mayor Galario nga ang Drug-Free Workplace Policy dili lang nagtinguha sa pakigbatok sa ilegal nga droga, apan nagpakita usab sa tinguha sa administrasyon nga magpabiling limpyo, hapsay, ug kasaligan ang mga kawani sa lokal nga pangagamhanan sa pag-alagad sa katawhan sa Valencia City.

Kung adunay magpositibo sa random drug testing, ipasaka kini sa confirmatory test aron pamatud-an ang resulta.

Hatagan usab ang mga empleyado ug opisyales og kinse (15) ka adlaw aron mopasaka og pagpanghimakak o reklamo kung adunay sila’y pagduha-duha sa resulta; apan kung dili sila mo-file sulod sa gihatag nga panahon, pagaisipon nga ilang gidawat nga pinal ang resulta.

Kung makumpirmang positibo, kinahanglan silang mopailalom sa rehabilitation program; ug kung dili mosunod, pasakaan sila og kaso nga grave misconduct nga mahimong hinungdan sa pagtanggal sa serbisyo publiko.

Dili na usab i-renew sa trabaho o i-subject for termination ang kumpirmadong positibo nga mga casual ug job order nga empleyado.(melbmadera)