Nasakmit sa mga myembro sa Kalilangan Municipal Police Station (KMPS) ang nibalor og P2,079,430.00 nga kantidad sa gidudahang shabu sa managlahi nga buy-bust operation

Nakuha sa Kalilangan MPS ang 200.9 gramos sa gidudahang shabu nga adunay balor nga P1,366,120.00 sa buy-bust operation nga natigayon sa Purok 3, Brgy. Kinura, Kalilangan, Bukidnon, pasado alas 12:40 a.m., Hulyo 22, 2025.

Nakorner sab ang 41-anyos nga si Alyas Niel, nga giilang usa ka high-value individual, kinsa residente sa Brgy. Bulua, Cagayan de Oro City.

Si Police Major Jayvee Babaan, spokesperson sa Bukidnon Police Provincial Office (BPPO), sa press conference kaniadtong Hulyo 23, 2025, miingon nga ang suspek nidayo sa dapit kalabot sa kalihokan nga may kalambigitan sa shabu trading.

Sa laing bahin, gabii sa Hulyo 16, 2025, nasakmit sa Kalilangan MPS gikan sa mag-live-in nga sila si Alyas Julius ug Alyas Marie ang 104.9 gramos sa gidudahang shabu nga adunay balor nga ₱713,310.00 sa buy-bust operation sa Purok 3, Brgy. Bangbang, Kalilangan.

Ang Kalilangan MPS mihikay sa kaso batok sa mga suspek kalabot sa kalapasan sa RA 9165, kon Comprehensive Dangerous Drugs Act of 2002. (melbmadera)