Nikabat sa P34,668.00 ang kantidad sa gidudahang shabu ug marijuana nga nasakmit sa bust bust operation Zone 10, Brgy. 1, Malaybalay City, Bukidnon pasado alas 6:00 sa gabii sa Mayo 29.

Si Police Lt. Col. Jerry A. Tambis, hepe sa kapolisan sa Malaybalay sa iyang report, niila sa suspek nga si Jopas Ilogon y Velez, 32, minyo, delivery boy ug residente sa Purok 9, Brgy. Sumpong, Malaybalay City, Bukidnon.

Nakuha gikan sa posisyon sa suspek ang pakite sa gidudahang shabu nga adunay estimated street value nga P500.00 isip buy bust item, laing pakite sa gidudahang shabu nga adunay estimated street value nga P34,000.00, pakite sa gidudahang marijuana nga adunay balor nga P168.00 ug P500.00 bill isip buy bust money.

Ang suspek ug nasakmit nga mga ebidensya ang gidala sa buhatan sa kapolisan sa Malaybalay. Pagkahuman, gitugyan sab ngadto sa Bukidnon Provincial Crime Laboratory nga nahimutang sa dakbayan.

Gihikay na sab sa kapolisan sa Malaybalay ang kaso batok sa suspek kalabotan sa kalapasan sa R.A. 9165 kon Comprehensive Dangerous Drugs act of 2002.