Isa ka coal seller ang gipatay sa wala mailang suspek samtang nanihapon sa lamesa gawas sa iyang panimalay sa Purok 1A, Brgy. Poblacion Norte, Don Carlos, Bukidnon.

Ang biktima nailang si Jovane Ruben y Bagacay, 38, adunay kapuyo, coal seller ug residente sa dapit.

Si Police Major Harvey A. Sanchez, ang acting chief of police sa Don Carlos sa iyang report, niingon nga ang biktima gipusil makaduha sa ulo pasado alas 7:10 gabii sa Mayo 31.

Sumala sa imbestigasyon sa kapolisan sa Don Carlos, ang suspek kalit lang nahiabot dayong pusil sa biktima. Nisibat ang mamumuno padulong sa kamaisan bitbit ang kalibre .45 pistola nga iyang gigamit sa krimen.

Ang pamunoan sa kapolisan sa Don Carlos, gimandoan ni Police Col. Jun Mark J. Lagare, provincial director sa Bukidnon Police Provincial Office sa pagpahigayon sa imbestigasyon aron pagsuta sa motibo sa krimen ug pag-ila sa suspetsado.