MALAYBALAY CITY, Bukidnon – Mikabat sa P361,870,034.74 ang total net savings sa procurement sa goods ug services alang sa infrastructure projects sa Malaybalay sulod sa upat ka fiscal years, base sa summary report sa Bids and Awards Committee (BAC)

Gisulti kini ni City Mayor Jay Warren R. Pabillaran sa iyang State of the City Address (SOCA) atol sa 28th Charter Day celebration kaniadtong Marso 23, 2026, sa San Isidro College Gymnasium.

Matod sa mayor, sa unang tuig sa iyang termino niadtong 2022, mikabat ang savings sa P67,667,415.28. Sa 2023, nisaka kini sa P74,890,845.35, dayon niabot sa P99,361,668.67 sa 2024. Sa 2025, ang price variance o savings sa procurement mitubo na sa P119,950,105.44.

Gipasabot ni Pabillaran nga ang nahipos nga kantidad gigamit matag sunod tuig aron masuportahan ang padayon nga pagpalambo sa lungsod.

Orihinal nga ginasaulog matag Marso 22, ang Charter Day sa Malaybalay karong tuiga gibaylo ngadto sa Marso 23 pinaagi sa Presidential Proclamation No. 1192, nga nagdeklarar niini nga Special (Non-Working) Day sa lungsod. (melbmadera)