SAN FERNANDO, Bukidnon – Nasunog ang Iglesia sa Dios Espirito Santo Church nga nahimutang sa Purok 8, Barangay Halapitan, buntag sa Marso 23, 2026

Una nga niresponde ang mga personnel sa Bureau of Fire Protection (BFP)–San Fernando, ug wala madugay miabot usab ang kapolisan aron motabang sa sitwasyon.

Sa inisyal nga imbestigasyon sa BFP, nasayran nga posibleng hinungdan sa sunog ang usa ka kandila nga wala mabantayi human sa baccalaureate mass sa mga graduating students bandang alas 5:30 sa buntag sa maong adlaw.

Gideklarar nga fire out ang sunog alas 8:10 sa buntag, nga adunay gibanabana nga kadaot sa istruktura nga mikabat sa PHP100,000.

Samtang, mimando si Police Col. Oliver S. Navales, provincial director sa Bukidnon Police Provincial Office (BPPO), sa San Fernando Municipal Police Station sa paghimo og lawom ug makuting imbestigasyon sa nahitabo. (melbmadera)