Mokabat sa P400,000 ang gibanabanang kantidad sa kapin 2,000 ka punoan sa marijuana nga
gipanglarot ug gipangdaut sa hiniusang operasyon sa kapolisan, militar ug Philippine Drug
Enforcement Agency o PDEA Bukidnon sa Cabanglasan, Bukidnon.

Nakita ang maong plantasyon niadtong Agosto 14 sa Sitio Catablaran, Barangay Canangaan, diin
gilunsad sa mga otoridad ang operasyon aron bungkagon ang ilegal nga pagpananom sa
marijuana sa maong lugar.
Sumala sa report, kapin 2,000 ka punoan sa marijuana ang nakaplagan ug gilaglag, nga adunay
gibanabanang street value nga P400,000.
Ang pagkalaglag sa maong mga tanom misunod sa operasyon sa hiniusang pwersa sa mga
otoridad, isip kabahin sa ilang padayong kampanya batok sa ilegal nga pagpananom ug pag-
apod-apod sa marijuana sa probinsya.
Sa isa ka Facebook post, gidayeg ni Cabanglasan Mayor Bernie Castillanes ang mga personnel
nga miapil sa operasyon tungod sa ilang kaisog, dedikasyon ug maayong koordinasyon sa
pagpatuman sa maong operasyon.
Gipasalamatan usab sa lokal nga pangagamhanan ang mga ahensya nga nagtinabangay sa
pagmonitor ug pagpakigbatok sa ilegal nga kalihokan sa mga hilit nga lugar sa lungsod.
Giawhag ni Castillanes ang mga residente nga magpadayon sa pagtinabangay ug pagbinantayon
pinaagi sa pagreport sa mga kahina-hinalang kalihokan aron malikayan ang ilegal nga mga
kalihokan ug mapadayon ang kalinaw ug seguridad sa Cabanglasan. (melbmadera)