Malampusong nasakmit ang gituohang smuggled nga mga sigarilyo ug nasikop ang usa ka tawo atol sa joint checkpoint operation sa Regional Border Control Point sa Barangay Kalagangan, San Fernando, Bukidnon, niadtong Enero 11, 2026

Sumala sa press release sa Information Division sa Police Regional Office 10 (PRO-10), nasakmit sa operasyon ang mga sigarilyo nga adunay gibanabana nga market value nga ₱720,000.00, lakip ang usa ka unit nga commuter van.

Ang sakyanan, nga gikan sa Quezon, Bukidnon padulong sa Kapalong, Davao del Norte, gimanehoan sa usa ka 37-anyos nga lalaki nga giila sa alyas nga “Rob,” minyo ug residente sa Barangay Magatos, Asuncion, Davao del Norte.

Atol sa pag-inspeksyon, namatikdan sa mga operatiba ang daghang master cases sa gituohang smuggled nga sigarilyo nga klarong gipatong sa sulod sa sakyanan. Nasuta usab nga ang mga sigarilyo walay gikinahanglan nga government health warning stickers. Sa dihang gihangyo nga ipresentar ang angay nga mga dokumento, napakyas ang drayber sa pagpakita sa bisan unsang legal nga papeles, hinungdan nga siya dihadiha nga gidakop.

Sa dugang imbestigasyon, nasayran nga ang suspek nalambigit na sa ilegal nga pagpamaligya og sigarilyo sukad pa niadtong 2020, ug nagahatod og kontrabando sa nagkadaiyang dapit sa Davao del Norte sa wala pa siya ma-intercept sa Bukidnon Border Control Point. (melbmadera)