Shabu ug usa ka pusil ang nasakmit gikan sa tulo ka tawo nga nasikop sa buy-bust operation sa kapulisan kaadlawon sa Pebrero 8, 2026 sa Purok 4, Barangay Base Camp, Maramag, Bukidnon.   Sumala sa report sa kapulisan, ang mga dinakpan giila sa ilang mga alyas nga “Tibor,” “Cocoy,” ug “Lalang.”

Nakuha gikan kanila ang 15 gramos nga gituohang shabu nga gibana-banang nikantidad og ₱102,000, ug usa ka kalibre .45 nga pistola nga adunay magazine ug mga bala.  

Matod sa Maramag Municipal Police Station, alas 2:06 sa kaadlawon gipahigayon ang buy-bust operation sa pakig-alayon sa Bukidnon Police Intelligence Unit ug Philippine Drug Enforcement Agency (PDEA) Region 10, nga miresulta sa pagkadakop sa tulo ka suspek.  

Lakip sa mga narekober ang usa ka sachet sa gituohang shabu nga gigamit isip buy-bust item, pipila ka laing sachet sa iligal nga droga nga gikustodiya sa mga suspek, usa ka pusil, cellphone, bag, coin purse, ug ang ₱500 nga buy-bust money.

  Sa pagkutlo ning balita, anaa sa kustodiya sa Maramag MPS ang mga dinakpan samtang gihikay ang mga kasong paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.   Ang mga nakumpiskang droga ug armas dad-on sa Police Forensic Unit 10 alang sa laboratory examination ug ballistic testing. (melbmadera)