Gipadayon sa City Veterinary Office (CVO), pinaagi sa Animal Welfare and Contagious Diseases Division nga gipangulohan ni Dr. Mark Ferdinand C. Arambala, ang pagpalig-on sa mga paningkamot sa pagpaniid batok sa Avian Influenza sa Dakbayan sa Malaybalay

Sumala sa press release sa CVO, kini nga lakang gihimo uban sa lig-on nga koordinasyon sa Bureau of Animal Industry (BAI), mga opisyal sa barangay, ug lokal nga mga magbubuhi og manok.

Sa pinakabag-ong kalihokan, mokabat sa 90 ka blood samples ang nakolekta gikan sa mga itik ug pabo sa mga barangay sa Apo Macote, Managok, ug San Martin isip kabahin sa padayon nga monitoring activity.

Ang maong surveillance ginabuhat kaduha matag tuig subay sa Avian Influenza Protection Program – Manual of Procedures 2025.

Dugang niini, ang tumong sa inisyatibo mao ang sayo nga pag-ila ug dali nga pagtubag sa mga posibleng outbreak aron mapugngan ang pagkaylap sa sakit, samtang ginapanalipdan ang industriya sa manok ug kahimsog sa publiko.

Giawhag usab ang mga poultry raisers nga mosunod sa estrikto nga biosecurity measures ug dayong mag-report sa bisan unsang dili kasagarang timailhan sa sakit ngadto sa labing duol nga opisina sa beterinaryo.

Sa katapusan, nanawagan ang CVO sa publiko alang sa panaghiusa ug kooperasyon aron mapadayon nga luwas ug gawasnon sa Avian Influenza ang mga komunidad sa Malaybalay. (melbmadera)

Mga empleyado sa City Veterinary Office sa Malaybalay nagpadayon sa Avian Influenza surveillance pinaagi sa pagkolekta og 90 ka blood samples gikan sa mga itik ug pabo sa Barangay Apo Macote, Managok, ug San Martin, isip kabahin sa paningkamot sa pagmonitor ug pagpugong sa sakit. (photo release)

Gisugdan sa Department of Social Welfare and Development (DSWD) ang paghatag og P5,000.00 cash relief assistance sa unang batch sa mga motorela drivers sa Valencia, nga gipahigayon sa Valencia City Hall Covered Court niadtong Abril 8, 2026, isip suporta sa ilang panginabuhi taliwala sa nagkagrabeng krisis sa lana nga resulta sa US-Iran war. (Photo courtesy of PIAD)