Patay ang isa ka buntis human madasmagi sa isa ka truck ang ilang fruit stand nga gi-ukopa sa Diversion Road, P-17, Landing, Casisang, Malaybalay City
Sumala sa report ni Police Lt. Col. Julius Clark Prisco M. Macariola IV, nahitabo ang aksidente pasado alas 7:10 sa buntag.
Ang biktima naila nga si Helen Robisquillo.
Sumala ni Macariola, ang biktima gidala sa ospital apan gideklarang dead on arrival.
Gawas sa biktima, naangol usab ang iyang pares nga si Melchor Epan y Papasin, 29.
Lakip sa mga naangol ang mga residente sa maong lugar nga si Sherly Arcilles, ug iyang duha ka menor de edad nga anak nga lalaki ug babaye.
Gitaho nga nawad-an og preno ang cargo truck hinungdan nga nabanggan niini ang duha ka balay uban sa fruit stand.
Ang giingon sakyanan gipanag-iyahan sa Sonic Steel Satelite Company sa Casinlot, Tagoloan, Mis. Or. ug gi-drayban ni Bevencio Narciso y Feliciano, 41, minyo, ug residente sa of P-2A, Gusa, Cagayan de Oro City.
Ang mga biktima gidala sa Bukidnon Provincial Medical Center ug Malaybalay Polymedic General Hospital alang sa pagtambal.
Ang drayber ug ang iyang helper nga si Ben Jack Vallejos y Vallero, hingkod, ug residente Brgy. Benitinan, Balingasag, Mis. Or. lakip sab sa na-angol.
Ang drayber gidala sa Malaybalay City Police Station alang sa hustong disposasyon. (MG Mayumi B. Madera)
