Mipasalig ang Del Monte Philippines, Incorporated (DMPI) nga motuman sa mga lagda sa lokal nga kagamhanan, human gidapit sa 27th Sangguniang Panlalawigan (SP), atol sa Committee
Hearing sa Committee of the Whole, niadtong Marso 7, 2023 sa SP Session Hall, Capitol Compound, Malaybalay City, Bukidnon.
Nasayran pinaagi sa sunod-sunod nga monitoring sa City Environment and Natural Resources Office (ENRO), nga pipila ka mga gi-alegar nga kalapasan ang nahimo sa DMPI, lakip na ang dili awtorisadong pagpalapad niini sa ilang pineapple plantations sa pipila ka mga barangay sa syudad sa Malaybalay, sukwahi sa nakalatid sa ilang Environmental Compliance Certificate (ECC).
Nahibaloan usab nga pipila sa ilang operasyon ang wala makakuha ug clearances o endorsement gikan sa mga hingtungdang barangays ug sa LGU-Malaybalay, ingon man napakyas kini ug kuha sa mga clearances gikan sa City Planning alang sa zoning certification ug sa City Agriculture’s Office alang sa food security purposes and sufficiency, hinungdan nga wala sila mahatagan ug business permit.
Gani, sunod-sunod nga mga resolusyon ang gipalabang ni 2nd District Board Member Nemesio B. Beltran, Jr., aron hangyoon ang Multi-partite Monitoring Team (MMT) ug Provincial Agriculture Office (PAgrO), nga imbestigahan ang maong kalapasan sa mga resolusyon ug ordinasa sa SP ug sa Sangguniang Panlungsod sa Malaybalay City, aron matuki kini sa
hawanan sa SP. Sa moang pagdungog, gibutyag ni Atty. Marco Parpan, Legal Counsel sa DMPI, nga kasamtanangan na silang naglihok sa pag-comply sa gikinahanglang mga rekisitos ug nagpasalig nga makigkooperar sa City ENRO, aron hingpit masunod ang mga lagda sa lokal nga kagamhanan, diin andam usab ang City ENRO nga tabangan sila niini nga lakang, sanglit nahimo usab silang kaabag sa kalambuan, ilabi na sa job opportunities niini sa probinsya. Giklaro usab ni Ms. Maria Anita L. Fernandez, City ENR Officer nga dili lamang DMPI ang ilang gitutokan, apan ang tanang plantasyon nga naglihok sa syudad, aron masiguro nga nagsunod kini sa mga ang environmental mitigations ug malikayan ang posibling pagbaha sa umaabot. (PR)