Usa ka 38-anyos nga lalaking turista ang gipusil sa Abaga ta Bayug Falls sa Sitio Dagunalan, Barangay Lantud, Talakag, Bukidnon buntag sa Pebrero 28, 2026

Sumala sa report sa Talakag Municipal Police Station, ang biktima unang gidala sa Bukidnon Provincial Hospital sa Talakag human makaangkon og mga samad pinusilan sa wala nga nawong, tuo nga liog, wala nga dughan, ug tuo nga bahin sa tiyan.

Human sa first aid, gibalhin siya sa Northern Mindanao Medical Center sa Cagayan de Oro City alang sa dugang nga pagtambal.

Matod sa tour guide, samtang naghatag siya og orientation sa mga turista sa maong lugar, kalit nilang nadungog ang buto sa armas gikan sa pikas nga bahin sa suba, mga 20 hangtod 30 metros ang gilay-on gikan sa ilang nahimutangan, hinungdan nga nagkatibulaag ang grupo.

Gidudahan sa kapolisan nga shotgun ang gigamit sa pagpamusil base sa mga samad nga naangkon sa biktima.

Padayon ang imbestigasyon sa Talakag Municipal Police Station aron mailhan ang suspek ug masuta ang motibo sa krimen. (melbmadera)