Pormal nang napirmahan sa City Government of Valencia ug Land Bank of the Philippines o
LandBank ang ₱2.74-bilyong term loan facility atol sa loan signing ceremony niadtong
Septiyembre 8, 2026.

Sumala sa kasayoran, nirepresentar sa City Government of Valencia sila Mayor Amie Galario ug
Vice Mayor Greizl Galario-Fernandez, samtang alang sa LandBank mitambong sila Nena P.
Mendoza, Bukidnon lending center head, ug Sharmilah S. Visto, account officer.
Sa iyang mensahe, giingon ni Vice Mayor Galario-Fernandez nga ang pagpirma sa loan
nagtimaan sa mas lig-on nga pinansyal nga pakigtambayayong tali sa siyudad ug LandBank, nga
gitumong sa pagsuporta sa padayong pagtubo ug kalamboan sa Valencia.
Gilauman nga gamiton ang loan alang sa dagkong proyekto sa siyudad, lakip ang pagtukod sa
bag-ong Valencia City Hall, pag-upgrade ug expansion sa Valencia City Good Samaritan General
Hospital, pagpalambo sa mga evacuation center ug community facilities, ug pagpalit og heavy
equipment ug medical equipment.
Mitambong usab sa seremonya si City Spokesperson Jun Galario, kauban ang mga department
head ug uban pang opisyal sa City Government of Valencia.
Ang maong loan facility gilauman nga makatabang sa siyudad sa pagpatuman sa mga dagkong
proyekto ug pasilidad nga gitumong sa pagpausbaw sa serbisyo publiko ug pagpalambo sa
kalidad sa kinabuhi sa mga molupyo. (melbmadera)