Duha ka barangay sa Valencia City naghimo og seremonya sa pagpirma ug pagsunog sa bandera sa CPP-NPA sa Barangay Sinabuagan Covered Court, Valencia City, Bukidnon, niadtong Agosto 29, 2025

Sumala sa Facebook page sa 89th Infantry Battalion, kini isa ka simbolikong lihok sa pagsupak batok sa insurgency ug isa ka bag-ong panumpa alang sa kalinaw ug pag-uswag.

Ang mga komunidad sa Barangay Sinabuagan ug Lumbayao nipakita og kusganong baruganan alang sa kalinaw.

Ilang gideklarar ang CPP-NPA-NDF isip “Persona Non Grata” ug gipangsunog usab sa publiko ang bandera sa grupo—isa ka klaro ug simbolikong pagsupak batok sa kasaysayan sa kapintas ug insurgency.

Nitambong sa maong kalihokan si Atty. Francesco Manuel R. Valdez, representante ni Mayor Amie G. Galario; Sinabuagan Barangay Captain Lourgina D. Butal; delegasyon sa Barangay Lumbayao nga gipangulohan ni Chairman Nelson P. Cabaluna; ug ang Alpha “Arbiter” Company nga gipangulohan ni First Lieutenant John Andrew S. Gloriani.

Ang ilang panaghiusa nagpakita sa isa ka tinibook nga baruganan—militar, gobyerno, ug komunidad—nga nagtinabangay alang sa malungtarong kalinaw ug kalamboan.

“Dili lang kini bahin sa pagwagtang sa insurgency; kini bahin sa paghatag gahum sa atong mga komunidad aron dawaton ang kalinaw isip bugtong agianan padulong sa unahan,” matod ni 1Lt. Gloriani atol sa seremonya. (melbmadera)