Alang sa kasaulogan sa Kaaumulan ning tuig, tulo lang ka mga local government unit sa Probinsya sa Bukidnon ang mag ilog alang sa korona sa street dancing

Ang tulo mao ang munisipyo sa Kalilangan ug mga dakbayan sa Malaybalay ug Valencia.

Ang uban nga mga contender nibalibad sa pag-apil tungod sa kakulang sa budget.

Si Butch Melendez, Provincial Tourism Officer niingon nga ang kinatibuk-ang pondo nga gigahin alang sa kasaulugan sa Kaamulan ning tuig, nikabat sa P17, 479,000.00.

Dugang niya, ang tulo ka partisipante adunay P2,000,000.00 nga subsidy matag isa.

Ang premyo sa unang pwesto nikantidad og P150,000.00, sa ikaduhang pwesto adunay P100,000.00, ug P75,000.00 alang sa ikatulong pwesto.

Ang street dancing competition gikatakdang ipahigayon karong Abril 22 nga magsugod sa alas 6:00 sa buntag.

Gawas pa niana, daghan sab ang mga nakalinyang kalihokan sama sa binibing bukidnon, motocross, dance sports, boxing, foodfest, musical fireworks ug uban pa.

Kini nga kasayuran nasayran kaniadtong Marso 06, atol sa media briefing nga gipangunahan ni Gov. Rogelio Roque nga gipahigayon sa The Garden ning dakbayan sa Malaybalay. (MG Mayumi B. Madera)