Mokabat sa 1,500 ka pamilya sa Quezon, Bukidnon ang nakadawat og 10 ka kilo nga bugas
matag isa isip rice assistance gikan sa Local Government Support Fund (LGSF) niadtong
Septiyembre 4, 2026, pinaagi sa programang “Bawat Bayan Makikinabang” (BBM) sa
administrasyong Marcos.

Gipangulohan ni Executive Secretary Ralph G. Recto ang mga kalihokan sa BBM sa munisipyo
atol sa iyang opisyal nga pagbisita sa Bukidnon, diin iyang giatiman ang pag-apod-apod sa rice
assistance ngadto sa mga benepisyaryo.
Matud ni Recto, gimando mismo ni President Ferdinand R. Marcos Jr. ang paghatod sa
konkretong serbisyo sa gobyerno ngadto sa mga komunidad, lakip ang Bagong Pilipinas Rice
Program nga nagkuha sa suplay sa bugas direkta gikan sa mga lokal nga mag-uuma.
Nasayran nga adunay P10 milyon nga LGSF allocation ang Quezon, diin P5 milyon ang gitagana
alang sa rice assistance ug laing P5 milyon alang sa mga micro-grant. Mokabat sa 8,000 ka
pamilya ang target nga benepisyaryo sa munisipyo, diin nagpadayon pa ang unang hugna sa pag-
apod-apod niadtong Septiyembre 4.
Kabahin ang Quezon sa P178 milyon nga LGSF rice assistance alang sa Bukidnon, nga
gitumong sa 261,000 ka pamilya sa tibuok probinsya. Nahuman na ang unang hugna sa upat ka
giplanong distribution rounds sa probinsya.
Matud pa ni Recto, importante ang Bukidnon sa prayoridad nga mga programa sa national
government tungod sa papel niini isip sentro sa Mindanao.
Ang pag-apod-apod sa rice assistance isa lamang sa mga kalihokan nga iyang gitutokan atol sa
iyang pagbisita sa Bukidnon niadtong maong adlaw, diin lakip usab sa iyang agenda ang
pagbisita sa ubang mga proyekto sa gobyerno. (melbmadera)