Malamposong napahigayon sa City Government of Valencia, kauban ang Department of the Interior and Local Government (DILG) Valencia City Field Office, ang “1st Mayor Amie Galario Localized Awarding of the Seal of Good Local Governance for Barangay (SGLGB) – Achievement Measured through Integrity and Efficiency of Barangay Leaders (AMIE),” niadtong Oktubre 10, 2025

Sumala sa Facebook post sa City Government of Valencia, gipasidungan sa maong kalihokan ang walo ka barangay nga nakapasar sa assessment sa SGLGB, nga mao ang Bagontaas, Barobo, Lumbo, Lurugan, Mailag, Nabag-o, San Isidro, ug Sinayawan, diin matag-isa kanila nakadawat og ₱40,000 cash incentive.

Gidawat usab sa Barangay Lumbo ug Barangay San Carlos ang special award isip Outstanding Lupong Tagapamayapa, diin matag-usa kanila nakadawat og seal ug ₱25,000 cash award.

Gipasidungan usab ang Barangay San Carlos nga regional awardee ug nominee para sa national level tungod sa ilang epektibong pagpanguna sa pagpatuman sa katarungan ug kalinaw sa barangay.

Samtang, giila usab ang 23 ka barangay nga aktibong mipartisipar ug nagpakita sa paningkamot aron makab-ot ang maayong pamalaod ug maayong pamunoan, isip padayon nga ehemplo sa good governance sa lokal nga lebel, diin matag-isa kanila nakadawat og ₱10,000 cash award.

Gipadayag ni Mayor Amie Galario ang iyang pagpasalamat sa mga barangay leaders sa ilang integridad, kahusayan, ug tinud-anay nga serbisyo publiko, nga nagpalig-on sa maayong pangagamhanan sa siyudad.

Nagpakita og suporta sa maong kalihokan sila Vice Mayor Greizl Galario-Fernandez, mga konsehales sa 10th Sangguniang Panlungsod, uban ni Councilor Rolando Centillas, nga maoy author sa ordinansa alang sa localized implementation sa SGLGB, ug si City Local Government Operations Officer (CLGOO) Jan Eric Manasan sa DILG Valencia City, uban ang suporta sa Valencia City Youth Development Office (VCYDO).

Ang Seal of Good Local Governance for Barangay (SGLGB) usa ka programa sa Department of the Interior and Local Government (DILG) nga nag-ila sa mga barangay nga nagpakita og epektibo ug responsableng pamunoan, ilabina sa mga aspeto sa pinansyal nga administrasyon, kalinaw ug kahusay, pag-andam sa katalagman, ug sosyal nga proteksyon.

Kini nga inisyatibo nagpasiugda sa tinguha sa lokal nga administrasyon nga magpabilin nga modelo sa maayong pagdumala, participatory governance, ug inclusive development. (melbmadera)