Gipakita ang mga maanindot nga talan-awon sa probinsya sa Bukidnon, pinaagi sa gipahigayon nga duha ka adlaw nga 1st Kaamulan Overland Expedition nga nagtangag sa tema nga “An expedition for unity, culture and tradition”

Base sa pahibalo sa lokal nga panggamhanan, ang expedition gipahigayon niadtong Abril 1-2, 2023. Ang mga maanindot nga kabukiran ug kasapaan sa lalawigan ang isa sa nahimong atraksyon alang sa mga over-landers diha sa ilang pagsubay palibot sa mga lungsod sa Lantapan ug Impasug-ong ug sa syudad sa Malaybalay. Ang pinaka-una nga 4×4 Kaamulan Overland Expedition gipasiugdahan pinaagi sa United Bukidnon Overland Expedition team, sa tinguha nga mapasundayag ang turismo sa lalawigan, ingon man mapasigarbo ngadto sa mga turista ang talagsaong kultura sa probinsya. (MG Mayumi B. Madera)