Nakabenepisyo ang mga mag-uuma sa tanang barangay sa dakbayan pinaagi sa libreng pagsusi
sa yuta nga gipahigayon sa Department of Agriculture–Bureau of Soils and Water Management
(DA-BSWM) Region 10, gamit ang ₱43-milyong Mobile Soil Laboratory (MSL).

Sigun sa kasayoran gikan sa city government, gipahigayon ang serbisyo gikan Oktubre 6 hangtod
9, 2026, sa City Hall sa Malaybalay, diin mikabat sa 74 ka sampol sa yuta gikan sa nagkadaiyang
barangay ang gisumite alang sa chemical, physical ug biological analysis.
Lakip sa mga sampol ang gikan sa mga umahan nga gitanoman og humay, mais ug high-value
commercial crops (HVCC). Pinaagi sa modernong kagamitan sa mobile laboratory, mas sayon
nang mahibal-an sa mga mag-uuma ang kahimtang sa ilang yuta ug ang angay nga pamaagi sa
pagdumala niini.
Kabahin usab sa inisyatiba ang pagbansay sa hustong pagkuha ug pagkolekta sa mga sampol sa
yuta, nga gipahigayon niadtong Oktubre 7 sa Farmers Training Center sa Barangay Casisang.
Mitambong niini ang 36 ka partisipante gikan sa Malaybalay ug sa kasikbit nga lungsod sa
Cabanglasan.
Ang pagbansay, nga gitawag og Proper Soil Sampling/Collection and Qualitative Soil Analysis,
naglakip sa lektyur ug aktuwal nga demonstrasyon sa pag-andam ug pagsusi sa mga sampol sa
yuta.
Gipangunahan ang kalihokan sa Mobile Soil Laboratory Team sa BSWM Region 10, uban sa
tabang sa Integrated Agricultural Laboratory Section sa City Agriculture Office (CAgO), nga
gipangulohan ni Jennifer Atay.

Kabahin kini sa Soil Health Program sa BSWM nga nagtumong sa pagpalambo sa kahibalo sa
mga mag-uuma sa hustong pag-atiman sa yuta ug paggamit sa siyentipikanhong pamaagi sa
pagpanguma.
Gilaoman nga ang mga resulta sa soil analysis makatabang sa mga mag-uuma sa pagtino sa
angay nga pagdumala sa ilang umahan ug paggamit sa abono, nga posibleng makadugang sa abot
sa mga tanom ug makapamenos sa dili angay nga gasto sa produksiyon.
Pinaagi sa maong programa, gipalig-on sa DA-BSWM Region 10 ug sa City Agriculture Office
ang paghatag og serbisyong pang-agrikultura nga mas duol sa mga mag-uuma, samtang gidasig
ang paggamit sa siyentipikanhong datos alang sa mas produktibo ug malungtarong pagpanguma.
(melbmadera)