Sa gubat sa pangutana, dili kusog sa tingog kondili kahait sa hunahuna ang labing dakong armas.
Ug sa entablado sa kahibalo, isa ka estudyante gikan sa Bukidnon ang mitindog aron ipakita nga
ang kalampusan bunga sa paningkamot, paggiya, ug lig-ong pagtuo sa kaugalingong abilidad

Misidlak ang ngalan sa Manolo Fortich National High School human niini makoronahan isip
kampiyon sa 2026 DTI Consumer Welfare Month Regional Quiz Bowl nga gipahigayon
niadtong Oktubre 17 sa N Hotel, Cagayan de Oro City. Napildi niini sa panaghagit sa kahibalo
ang laing 14 ka eskwelahan sa tibuok Rehiyon 10 nga nag-ilog sa unang puwesto sa maong
kompetisyon.
Sa luyo sa maong kadaugan mao si Gilkiah Andrea A. Benedicto, ang estudyanteng nagdala sa
bandera sa DTI-Bukidnon, uban sa iyang coach nga si Mark Anthony C. Sangco, nga mitabang
sa paghulma sa iyang kahandam ug pagsalig sa kaugalingon.
Sumala sa DTI Bukidnon, isip ganti sa iyang talagsaong pasundayag, nakadawat si Benedicto og
plake ug ₱11,000 nga premyong salapi, samtang ₱5,500 ang gihatag ngadto sa iyang coach.
Apan labaw sa plake ug salapi ang bili sa maong kadaugan. Kini isa ka pamatuod nga ang
edukasyon dili lamang kutob sa mga leksiyon sulod sa klasrum, kondili isa usab ka suga nga
naghatag og giya sa mga batan-on aron masabtan ang ilang mga katungod ug responsibilidad sa
katilingban.
Pinaagi sa kompetisyon, napasiugda ang kamahinungdanon sa kahibalo bahin sa mga katungod
sa konsumidor—gikan sa maalamong pagpili sa mga produkto ug serbisyo hangtod sa
pagpanalipod batok sa dili makiangayon nga mga pamaagi sa pamaligya.
Ang kalampusan ni Benedicto nagdala usab og mensahe sa mga kabatan-onan sa Bukidnon: nga
ang kahibalo mahimong taming batok sa pagpahimulos, ug ang isa ka estudyanteng andam
makat-on mahimong tingog sa mga konsumidor nga nangandoy og patas ug responsable nga
pamaligya.
Sa kadaugan sa Manolo Fortich National High School, dili lamang isa ka tropeyo sa kahibalo ang
gidala pauli sa Bukidnon. Gidala usab niini ang inspirasyon nga ang mga batan-on, kon hatagan
og hustong kahigayonan ug paggiya, makahimo sa paglambo sa kaugalingon ug pag-amot sa isa
ka katilingban nga mas nahibalo sa ilang mga katungod. (melbmadera)