MALAYBALAY CITY, Bukidnon (January 14, 2024) – Mokabat sa 146 ka mga estudyante, kadaghanan kanila sakop sa Talaandig nga tribo sa Talakag, Bukidnon ang makabenepisyo sa mga interbensyon gikan sa Departamento sa Agrikultura sa Amihanang Mindanao

Sumala sa pahibalo sa DA, gidawat ni Joemari D. Alog, school in-charge sa Tankulan Elementary School sa Brgy. Lirongan ang gitugyan nga mga gamit kaniadtong Enero 12, 2024.

Nadawat nila ang pipila ka sachet sa 5-in-1 nga mga liso sa Pinakbet ug garden tools nga gil;angkuban sa light hoe, plastic seedling tray, pala, sprinkler, ug weeding bolo.

Ang mga gamit gitugyan sa DA-10 pinaagi ni Joel S. Rudinas, deputy project director sa Mindanao Inclusive Agricultural Development Project (MIADP).

Diha sab sa pagtugyan si Kersten S. Pagalan, ang High Value Crops Focal Person sa DA-10.

Si Alog mipaabot sa iyang pasalamat sa kahigayonan nga gihatag sa ahensya alang sa mga tunghaan nga makapahimulos sa tabang nga dako og ikadalit sa pagsulbad sa malnutrisyon sa mga estudyanteng IP.

Gipaambit usab niya, nga ang maong paningkamot agig suporta sa Gulayan sa Paaralan program sa DepEd diin makapahigayon sila og supplementary feeding uban sa ilang mga produkto.

Giawhag ni Rudinas ang matag tinun-an nga mananom sa ilang tagsa-tagsa ka backyard ug kinahanglang bantayan sila sa eskwelahan aron maseguro ang food security sa matag panimalay sa posibilidad sa El Niño nga panghitabo.

Gawas niini, iyang gidasig ang tunghaan sa paggahin og luna alang sa nursery sa utanon isip
malungtarong tinubdan sa pagkaon. (melbmadera)