Isa ka free medical mission nga maghatag sa kasolbaran sa depektibong panan-aw ang pagahatagan sa pagtagad sa dili madugay

Ang provincial government sa Bukidnon sa isa ka kasayoran, mibutyag nga nangandam na kini alang sa pakigtimbayayong sa kaabag nga grupo.

Ang Fred Hollows Foundation nga gipangunahan sa ilang Country Manager nga si Dr. Maria Victoria Rondaris, isa ka International Non-Government Organization pormal nga nakigtagbo kang Gov. Rogelio Neil P. Roque sa Provincial Governor’s Office Conference Room, Kaamulan Park, Malaybalay City, Bukidnon kaniadtong Enero 22, 2024.

Ang Fred Hollows Foundation nakatakdang muhatag og serbisyo sa katawhan nga adunay problema sa panan-aw.

Pinaagi sa gihan-ay nga free medical mission, mapahimuslan sa katawhan nga nagkinahanglan niini nga serbisyo; ang libre nga antipara ug financial assistance alang sa optometrists nga mag-assist sa maong kalihukan alang sa libre nga opera.

Kini isa ka 4-year project nga gititulohan og “Eye Health System Strengthening Project” nga nakalinya sa DOH-National Prevention of Blindness Program.

Sumala sa kasayoran, kung masugdan sa Bukidnon, mao kini ang pinaka-una sa Mindanao.

Sa pagkakaron, giplanohan pa kung asa ang mamahimong venue sa nasangpit nga Fred Hollows Foundation Medical Mission. (melbmadera)