Gilantaw nga magpasayon sa mga kliyente sa Bukidnon Provincial Medical Center (BPMC) ang pagatukoron nga Governor’s Corner alang sa implementasyon sa No Balance Billing (NBB) Policy sa PhilHealth

Kaniadtong Hulyo 15, 2025, namahayag si Dr. Miguel Antonio C. Prantilla, chief of hospital sa BPMC, nga tumong niini nga programa ni Governor Rogelio Neil P. Roque nga dili na magastuhan sa pamasahe ug panahon ang pamilya sa mga pasyente, tungod kay anaa na man sulod sa BPMC ang mga ahensya nga dangpanan sa panahon sa pagproseso sa bayranan sa ospital.

Taliwala sa mga hagit sa pagpatuman niining maong programa—sama sa availability sa mga tambal ug medical supplies—mapadayonon ang BPMC nga motabang ug magiyahan sa mga nanginahanglan, ilabi na niadtong kabus nga mga kliyente.

“Challenging pud kaayo siya. Ang budget man gud sa hospital from the start, dili man gyud enough para sa whole year nga operation. Moabot gyud ang time sa operation nga mahutdan ta. Ug tungod sa atoang sistema sa procurement, ma-delay ang delivery ug taas-taas pud ang process,” tipik sa pamahayag ni Dr. Prantilla.

Ang NBB nagpasabot nga ang kwalipikado nga mga pasyente kinahanglan nga dili magbayad bisan peso gikan sa ilang bulsa alang sa mga sakop nga serbisyong medikal kung na-confine sa government hospitals.

Gilaraw sa NBB nga mapanalipdan ang labing financially vulnerable nga mga Pinoy, sama sa indigents, senior citizens nga na-enroll sa PhilHealth, persons with disabilities, ug sponsored members, kinsa makapahimulos sa mga serbisyong naglakip sa room and board, drugs and medicines, laboratory exams, operating room and professional fees. Angayang masayran nga ang mga ospital wala gitugutan nga magkolekta ug dugang bayranan sa panahon sa pagpauli, subay sa gitaganang provision sa NBB policy sa PhilHealth. (pr)