Kaniadtong Agosto 4, 2025, pormal nga gilunsad sa Dakbayan sa Valencia ang programa nga “AMIE” o Agricultural Modernization and Innovative Exploration atol sa gipahigayon nga Convocation alang sa bulan sa Agosto

Sumala sa Facebook post sa City Government of Valencia, namugna ang maong programa pinaagi sa City Agriculture Office ubos sa pagpangulo ni Senior Agriculturist ug Officer-in-Charge Clementino Esto Jr., uban ang bug-os nga suporta ni Mayor Amie Galario.

Tumong niini ang pagpalig-on sa sektor sa agrikultura pinaagi sa modernong teknolohiya ug inobatibong mga pamaagi nga dakong tabang alang sa mga mag-uuma.

Lakip sa mga inisyatiba ang paghatag og gagmay’ng makinarya sa uma ug digital nga mga kagamitan para sa soil testing; paghatag og input materials sama sa liso, bio-fertilizer, ug organic compost alang sa sustainable farming; ug paghatag og kagamitan alang sa food processing ug value-adding.

Gilauman usab ang paghatag og seed money para sa organic fertilizer production ug production loan aron masuportahan ang panginabuhi ug negosyo sa mga mag-uuma.

Dugang pa, magpahigayon og teknikal nga suporta pinaagi sa mga seminar ug training aron mapalapad ang ilang kahibalo sa modernong pamaagi sa pagpanguma.

Atol sa maong okasyon, nihatag usab og binhi sa utanon ang CAgO ngadto sa mga giimbita nga mga representante sa nagkalain-laing barangay.

Tumong niini nga dasigon ang pagtanom og utanon sa kaugalingong yuta o bakanteng luna alang sa pagkaon sa pamilya ug pagpalambo sa food sufficiency sa komunidad.

Isa kini sa mga paagi sa lokal nga kagamhanan aron masuportahan ang sustenableng panginabuhian ug mapalapdan ang backyard gardening sa syudad. (melbmadera)