Ang Top 1 ug Top 5 nga most wanted person sa Region 10 parehong nakorner sa probinsya sa Bukidnon sa managlahi nga higayon kaniadtong Agosto 2, 2025

Sumala sa police report, sa alas 11:10 sa buntag, nasikop sa mga myembro sa Quezon Municipal Police Station (QMPS) uban sa mga myembro sa Bukidnon PIU si Erning Traya Zapanta didto sa Balangay 6, Bongbongon, Quezon, Bukidnon.

Siya ang Top no. 1 MWP sa Regional Level, 33, ulitawo, laborer, ug residente sa dapit.

Gisikop siya pinasubay sa warrant of arrest sa tulo ka ihap sa kasong Qualified Rape nga nakadokit sa kaso kriminal numero 486-M, 487-M, ug 488-M pinetsahan Hulyo 22, 2025, nga walay girekomendang piyansa.

Sa laing bahin, nakorner sa mga personahé sa Manolo Fortich Municipal Police Station (MFMPS) uban sa RSOU-10, 1st BUK PMFC, Bukidnon PIT, RIU 10, ug BUK PIU si El John Con-ogan Engaling.

Siya nasikop sa Zone-6, Brgy. Mantibugao, Manolo Fortich, Bukidnon, pasado alas 10:30 sa gabii.

Ang dinakpan nailang Top No. 5 MWP sa Regional Level, 18, ulitawo, mag-uuma, ug residente sa dapit.

Nakorner siya pinasubay sa warrant of arrest sa kasong murder nga nakadokit sa kaso kriminal numero 25-07-8898 pinetsahan Hulyo 30, 2025, ug walay girekomendang piyansa alang sa iyang temporaryong kagawasan. (Diego M. Hidalgo)