MALAYBALAY CITY, Bukidnon — Nangibabaw ang Bukidnon 4-H Club sa rehiyon human makuha niini ang 1st Place – Overall Champion sa gipahigayon nga 11th 4-H Regional Young Farmers Camp and Agrilympics 2025

Sumala sa Facebook post sa LGU Bukidnon, ang kalihokan gilunsad niadtong Setyembre 16-19 sa Northern Mindanao Agricultural Crops and Livestock Research Complex (NMACLRC), Dalwangan, dinhi sa syudad.

Gipakita sa delegasyon gikan sa Bukidnon ang ilang kahanas ug kaisug sa nagkadaiyang agricultural competitions nga nagtutok sa agrikultura, kabag-ohan, ug pangliderato sa kabatan-onan. Ang paningkamot sa grupo nakahatag ug dungog sa probinsya, nga nagpadayong mahimong lider sa Northern Mindanao pag-abot sa sektor sa kabatan-onang mag-uuma.

Ang kalihokan gipasiugdahan sa Agricultural Training Institute – Region X (ATI-10) ug gisalmotan sa mga young leaders ug agri-advocates gikan sa nagkalain-laing probinsya sa rehiyon.

Pinangulohan sa coordinator nga si Ms. Shiela Mae E. Karim, ang Bukidnon 4-H Club nagpasalig nga ipadayon ang suporta ug paggiyà sa kabatan-onang magsusugod ug magpadayon sa agri-negosyo.

Gilauman nga ang ilang kadaugan mahimong inspirasyon sa mas daghang batan-on nga mosulod sa agrikultura isip usa ka panginabuhian nga puno sa potensyal. (melbmadera)