MALAYBALAY CITY, Bukidnon — Aron mapalig-on ang kooperasyon sa agrikultura ug mapalambo ang sustainable smart farming practices, mibisita ang mga representante gikan sa Republic of Korea sa Department of Agriculture – Northern Mindanao Agricultural Crops and Livestock Research Complex (DA–NMACLRC) aron susihon ang smart greenhouse facility nga gitukod pinaagi sa proyekto nga gipondohan sa Korea

Ang pagbisita gihimo niadtong Nobyembre 7, 2025, nga gipangulohan sa mga opisyal sa Ministry of Agriculture, Food and Rural Affairs (MAFRA) ug sa Korea Agency of Education, Promotion and Information Service in Food, Agriculture, Forestry and Fisheries (EPIS).

Matod sa press release sa DA, kini bahin sa proyekto nga “Internship Program on Smart Agriculture for Young Filipinos”, nga gipadagan sa pakigtambayayong sa DA–Agricultural Training Institute (ATI).

Gipunting sa mga Korean representatives nga ang internship program maghatag og oportunidad sa paggamit sa NMACLRC smart greenhouse isip training facility.

Ang inisyatibo nagtumong sa pagpalambo sa teknikal nga kahibalo sa smart farming, paghimo og inobasyon sa agrikultural nga produksyon, ug pagpabilin sa lig-on nga kooperasyon tali sa DA ug sa mga Korean counterparts. (melbmadera)