Nanguna ang Bukidnon sa tanang probinsiya sa Mindanao sa kinatibuk-ang kita gikan sa lokal
nga tinubdan niadtong 2025, nga mikabat sa kapin ₱1.69 bilyon, base sa datos sa Bureau of
Local Government Finance (BLGF).

Sumala sa Statement of Receipts and Expenditures (SRE) sa BLGF, mikabat sa
₱1,692,372,329.36 ang lokal nga kita sa Bukidnon, nga milabaw sa Davao de Oro nga adunay
₱1.09 bilyon ug South Cotabato nga mikabat sa ₱992.32 milyon.

Misunod sa ika-upat nga ranggo ang North Cotabato nga adunay ₱967.21 milyon, samtang ang
Misamis Oriental misakop sa ikalimang pwesto nga adunay ₱829.74 milyon.
Ang ubang probinsiya nga misulod sa unang napulo mao ang Lanao del Norte, Misamis
Occidental, Agusan del Sur, Davao del Norte ug Davao Oriental.
Sa kinatibuk-an, 28 ka probinsiya sa Mindanao ang gilakip sa ranggo. Ang lokal nga kita sa mga
probinsiya nagkalahi gikan sa ₱1.69 bilyon sa Bukidnon hangtod sa ₱6.41 milyon sa Sulu, nga
nahimutang sa pinakaubos nga ranggo.
Ang lokal nga tinubdan sa kita kasagarang naglakip sa mga buhis, bayranan ug uban pang kita
nga direktang nakolekta sa lokal nga pangagamhanan, lahi sa mga bahin niini gikan sa
nasudnong gobyerno.
Naghatag ang maong datos og hulagway sa kapasidad sa mga probinsiya sa pagmugna og
kaugalingong kita aron suportahan ang ilang mga programa ug serbisyo publiko. Apan, ang taas
nga lokal nga kita dili lamang sukdanan sa kinatibuk-ang kahimtang sa panalapi sa isa ka
probinsiya, tungod kay nagdepende usab kini sa gidak-on sa ekonomiya, mga kalihokan sa
negosyo ug uban pang tinubdan sa pondo.
Ang datos gibase sa 2025 SRE sa BLGF, ang ahensiya nga nagmonitor sa kahimtang sa panalapi
sa mga lokal nga pangagamhanan sa nasud. (melbmadera)