Patay ang isa ka 54-anyos nga lalaki human gisungag sa kabaw samtang nagdaro sa uma sa
Purok Malinawon, Barangay Pinamaloy, Don Carlos, Bukidnon, alas 3:40 sa hapon niadtong
Oktubre 20

Base sa inisyal nga imbestigasyon sa Don Carlos Municipal Police Station (MPS), nagdaro sa
uma ang biktima gamit ang kabaw dihang iyang gibunalan ang maong hayop, hinungdan nga
misamot kini og kaagresibo ug gisungag siya sa ulo.
Sumala kang Police Major Al-Nico R. Haman, hepe sa Don Carlos MPS, gidala ang biktima sa
Bukidnon Provincial Hospital–Maramag alang sa medikal nga pagtambal, apan gideklarang dead
on arrival sa attending physician tungod sa grabeng samad sa ulo.
Ang igsoon sa biktima ang personal nga mitaho sa insidente ngadto sa kapulisan. Human
madawat ang report, miadto ang mga pulis sa ospital aron pag-verify sa nahitabo ug gipangutana
usab ang saksi aron matino ang mga sirkumstansiya sa insidente.
Gimando ni Bukidnon Police Provincial Office director PCOL Oliver Sotto Navales ang Don
Carlos MPS nga magpahigayon og hingpit nga imbestigasyon sa maong insidente. (melbmadera)