Duha ka babaye ang namatay samtang lima pa ka tawo ang gidala sa ospital human nahulog sa
spillway ang isa ka jeep ug isa ka motorsiklo nga adunay sidecar sa Sitio Cable, Barangay
Nangka, Libona, Bukidnon, alas 4:30 sa hapon niadtong Oktubre 17

Base sa imbestigasyon sa Libona Municipal Police Station (MPS), padulong sa Baungon ang
jeep nga gimaneho sa 63-anyos nga lalaki ug gisakyan sa lima ka pasahero, kinsa mga
empleyado sa Del Monte Philippines, Inc., dihang nawad-an kini og kontrol samtang nanaog sa
bakilid nga dalan human molapas sa laing sakyanan.
Sumala kang Police Captain Erwin James D. Tabequero, OIC sa Libona MPS, wala na
makabalik sa hustong lane ang drayber, hinungdan nga nabangga niini ang konkretong harang ug
ang motorsiklo nga walay plaka nga temporaryong nakaparada sa daplin sa karsada. Tungod
niini, nahulog sa spillway paingon sa suba ang duha ka sakyanan.

Gidala sa rescue team sa Libona Municipal Disaster Risk Reduction and Management Office
(MDRRMO) ang mga pasahero sa jeep ngadto sa Northern Mindanao Medical Center Provincial
Hospital sa Cagayan de Oro City alang sa medikal nga pagtambal.
Apan, gideklarang dead on arrival ang isa ka 34-anyos nga babaye alas 4:40 sa hapon, samtang
ang laing 37-anyos nga babaye gideklarang dead on arrival usab alas 6:39 sa gabii sa maong
adlaw.
Samtang, anaa sa kustodiya sa Libona MPS ang drayber sa jeep alang sa hustong disposisyon.
Gimando ni Police Col. Oliver S. Navales, director sa Bukidnon Police Provincial Office, ang
Libona MPS nga hugot nga ipatuman ang mga balaod sa trapiko ug magpahigayon og random
checkpoints aron masiguro ang kaluwasan sa mga motorista. Giawhag usab niya ang mga
drayber nga magmaneho nga responsable ug magmatngon kanunay sa dalan. (melbmadera)