Nakit-ang patay ang isa ka 42-anyos nga security guard samtang anaa sa duyan sulod sa iyang
gipuy-ang lawak sa isa ka bunkhouse sa Alcovar Farm, Purok 3, Barangay Dalwangan,
Malaybalay City, Bukidnon buntag sa Oktubre 17

Sumala sa Bukidnon Police Provincial Office (BPPO), nadiskobrehan ang lawas sa biktima mga
alas 11:30 sa buntag human gitaho sa barangay kapitan ang insidente ngadto sa Malaybalay City
Police Station (CPS).
Base sa inisyal nga imbestigasyon, nakita pa ang biktima nga misulod sa iyang lawak mga alas
11 sa gabii niadtong Oktubre 16, human sa iyang duty isip security guard. Pagkasunod buntag,
namatikdan sa iyang mga kauban nga dugay na kining wala makita, hinungdan nga ilang gisusi
ang iyang lawak.
Nakit-an ang lalaki nga naghigda sa isa ka duyan nga panapton, diin ang katunga sa iyang lawas
gitabonan og habol ug wala nay timailhan sa kinabuhi.
Ang biktima lumulupyo sa Makalangot, Arakan, North Cotabato. Sumala sa report, usahay
makasinati kini og mga sintomas nga may kalabotan sa taas nga presyon sa dugo.
Walay dayong nakitang timailhan sa pagpangilabot o foul play sa lugar, samtang gikonsiderar
ang cardiac arrest isip posibleng hinungdan sa kamatayon. Apan, ang maong hinungdan wala pa
pormal nga makumpirma pinaagi sa dugang nga medikal nga resulta.
Gidala ang lawas sa Bukidnon Provincial Medical Center (BPMC) sa Malaybalay, diin
gipamatud-an sa attending physician ang iyang kamatayon. Gibalhin dayon ang mga patayng
lawas ngadto sa Villanueva Funeral Parlor alang sa embalming ug uban pang gikinahanglang
proseso.
Gimandoan ni Bukidnon police provincial director PCOL Oliver S. Navales ang Malaybalay
CPS sa pagpahigayon og hingpit nga imbestigasyon sa maong insidente. (melbmadera)