Nasikop ang isa ka 27-anyos nga babaye nga giila sa alyas nga Jaijai sa operasyon batok sa ilegal
nga droga sa Purok 2, Barangay Poblacion, Valencia City, sa gabii sa Oktubre 15.

Sumala sa report ni Police Lt. Col. Hope Mark L. Orbuda, officer-in-charge sa Valencia City
Police Station, nahitabo ang operasyon mga alas 10:55 sa gabii nga gipahigayon sa Drug
Enforcement Unit sa Valencia CPS, kauban ang 2nd Provincial Mobile Force Company,
Provincial Intelligence Unit, Philippine Drug Enforcement Agency (PDEA)-10 Bukidnon ug
City Anti-Drugs Special Unit Team (CADSUT).
Nakuha gikan sa suspek ang upat ka heat-sealed plastic sachet nga adunay gituohang shabu, nga
mitimbang og 5.2 gramos ug gibanabanang nagkantidad og ₱35,360, base sa standard drug price.
Nasakmit usab sa operasyon ang isa ka itom nga Infinix Android cellphone, isa ka kaha sa
sigarilyong Marlboro nga gigamit kunong sudlanan sa shabu, ug isa ka ₱500 nga papel nga
kuwarta.
Giandam na ang mga kasong paglapas sa Sections 5 ug 11, Article II sa Republic Act 9165 o
Comprehensive Dangerous Drugs Act of 2002 as amended, alang sa pagsang-at sa korte.
Ang mga nasakmit nga drug evidence gidala sa Provincial Forensic Unit alang sa qualitative ug
quantitative examination, samtang ang suspetsada anaa na sa kustodiya sa Valencia CPS alang sa
dokumentasyon ug hustong disposisyon.
Gidayeg ni Police Col. Oliver S. Navales, director sa Bukidnon Police Provincial Office, ang
mga pulis nga miapil sa operasyon ug giawhag ang publiko nga makigtambayayong sa kapulisan
ug uban pang ahensiya sa pagpatuman sa balaod aron mapalig-on ang kampanya batok sa ilegal
nga droga sa probinsiya. (melbmadera)