Monday, February 24, 2025

Author: Diego M. Hidalgo

Managsuon gipangdunggab sa Kibawe

Posted on by Diego M. Hidalgo

Duha ka managsuon gidunggab sa ilang balay sa Purok-1 Old Kibawe, Kibawe, Bukidnon niadtong Marso 26, 2023

Ang mga biktima giila nga sila Ali Rosell y Catalbas, 45, minyo, driver, ug residente sa Rosario, Agusan del Sur, ug si Isidro Rosell y Catalbas, 49, minyo, taxi driver, ug residente sa Tablon, Cagayan De Oro City.

Si Police Maj. Marvin T. Enciso, OIC sa Kibawe Municipal Police Station nisulti sa iyang report nga ang mga biktima gidunggab sa 12inches nga hunting knife sa suspek.

Ang suspek giila nga si Dominador Lozarita y Madcaw, 46, minyo, ug residente sa Libertad, Old Kibawe, Kibawe, Bukidnon.

Gitaho nga ang suspek gigukod sa mga barangay tanod tungod sa pagdala niini og hunting knife. Ubos sa impluwensiya sa ilimnong makahubog, ang suspek niabot sa pinuy-anan sa mga biktima nga adunay panagtapok sa pamilya ug dayong nanaksak.

Ang mga biktima dayon gidala sa Bukidnon Provincial Hospital-Kibawe ug karon anaa na sa maayong kahimtang. (Diego M. Hidalgo)

Pag-implementar sa livelihood program aprobado na sa SP

Posted on by Diego M. Hidalgo

Giaprobahan na sa Sangguniang Panlungsod ang Resolution Nos. 2023-0283 mao ang Memorandum of Agreement tali sa City Government of Malaybalay ug Department of Social Welfare and Development (DSWD) Regional Field Office 10 mahitungod sa pag implementar sa livelihood program

Base sa pahibalo sa lokal nga panggamhanan, kaniadtong Marso 3, 2023, si Mayor Jay Warren R. Pabillaran nag endorso ngadto sa SP uban sa paghangyo nga siya pagatugutan sa pagsulod sa isa ka kasabutan mahitungod sa nasangpit nga programa.

Tumong ug tinguha sa programa nga matabangan og mapalambo ang panginabuhian sa katawhan labi na sa mga kabus dinhi sa dakbayan.

Gi-uyunan usab sa duha ka partido ang uban pang mga termino nga natala sa nasangpit nga kasabutan. (Diego M. Hidalgo)

Turn-over sa DA hydroponics project, paglunsad sa LGU corn seeds and fertilizer distribution gipahigayon sa Malaybalay

Posted on by Diego M. Hidalgo

Ang Department of Agriculture Region 10 ug ang City Government of Malaybalay nagkahiusa sa pag-turn-over sa DA hydroponics project ug ang paglunsad sa pagpang-apod-apod sa LGU corn seeds and fertilizer niadtong Marso 20, 2023 sa City Agriculture Office Compound, Casisang, ning dakbayan

Base sa pahibalo sa lokal nga panggamhanan, isip duha sa nag-unang mga ahensiya nga gahatag og pundo sa City Agriculture Office, tumong niini nga madugangan ang produksiyon ug kita sa mga mag-uuma aron makatampo sa paglambo sa ekonomiya sa dakbayan.

Ang kinatibuk-ang kantidad alang sa mga interbensyon mokabat sa Php2,948,115. (Diego M. Hidalgo)

TUPAD workers sa Valencia nakadawat sa sweldo

Posted on by Diego M. Hidalgo

Muabot sa 291 ka mga benepisyaryo sa Tulong Panghanapbuhay sa Ating Disadvantaged/Displaced Workers (TUPAD) sa Valencia City ang nakadawat na sa ilang sweldo

Base sa pahibalo sa lokal nga panggamhanan, ang mga benepisyaryo naggikan sa Barangay Sinayawan, Catumbalon, ug Maapag.

Nakadawat sila sa ilang payout niadtong Marso 16, 2023 human sa pulo ka adlaw nilang pagpanarbaho sa tagsa-tagsa nilang mga barangay.

Ang maong programa nga gipahigayon sa Department of Labor and Employment (DOLE) pinaagi sa Employment and Placement Services Division (EPSD), nagatumong sa pagtabang sa katawhan nga naapektohan ang panginabuhian hinungdan sa mga kalamidad. (Diego M. Hidalgo)

Supplementary feeding program sa kabataan edad 2 ngadto 5 anyos nga anaa sa child development centers, mapatuman na

Posted on by Diego M. Hidalgo

Giaprubahan na sa Sangguniang Panlungsod ang SP Resolution No. 2023-0268 mao ang Memorandum of Understanding (MOU) tali sa City Government of Malaybalay ug sa Department of Social Welfare and Development (DSWD) mahitungod sa supplementary feeding program alang sa mga bata nga anaa sa child development centers.

Base sa pahibalo sa lokal nga panggamhanan, sulod sa maong tahas, pagatutukan ug hatagan og masustansyang pagkaon ang mga bata nga undernourished sa dili moubos sa 120 ka adlaw.

Nauyunan usab ang uban pang mga termino ug kundisyon nga natala sa nasangpit nga MOU. Tungod niini, mas mahatagan ug pagtagad ang mga bata nga anaa sa Child Development Center labi na kadtong mga bata nga kulang sa sustansiya. (Diego M. Hidalgo)

Capability Building for Livelihood gipahigayon sa Valencia

Posted on by Diego M. Hidalgo

Mabungahon nga napahigayon ang duha ka adlaw nga Capability Building for Livelihood alang sa Association of Families for Nutrition Improvement (AFNI) kaniadtong Marso 9-10, 2023 sa dakbayan sa Valencia

Sa pahibalo sa lokal nga panggamhanan, kini nga kalihokan gipasiugdahan sa Central Mindanao University (CMU) pinaagi sa Department of Mechanical Engineering, Business Administration, ug Accountancy.
Tumong niini nga maangkon sa mga partisipante ang dugang kaalam kalabot sa maayong pagdumala sa panginabuhian, pipila ka mga bililhong hilisgotan ang gihatod kanila sa mga faculty sa nasangpit nga mga departamento sa CMU.
Atol sa maong kalihokan, isa ka Plastic/Cellophane Shredder Machine gikan sa CMU, Department of Mechanical Engineering, ang gihatag sa City Nutrition Committee alang usab sa kapuslanan sa siyudad. (Diego M. Hidalgo)

3 gidunggab sa kainom sa Malaybalay

Posted on by Diego M. Hidalgo

Tulo ka tawo ang gidunggab sa ilang kainom sa Purok-6, Barangay Magsaysay, Malaybalay City

Duha ang patay ug isa ang samdan sa insidente nga nahitabo kaniadtong Marso 04, 2023 pasado alas 9:05 sa gabie.

Ang namatay mao sila Julie Cabonada Maraasin, 58, minyo, laborer; ug Danilo Cabonada Maraasin, 52, minyo, laborer.

Samtang samdan si Sofronio Ojano Tina-an, 59, ulitawo, laborer.

Ang suspek giila nga si Paquito Cabonada Maraasin, 55, minyo, laborer.

Gitaho nga ang mga biktima ug ang suspetsado nagkainom sa panimalay ni Sofronio Tina-an, sa dihang nagkalalis kini gumikan sa hisgutanan kabahin sa gold mining.

Giingon nga giibot sa suspek ang iyang kutsilyo nga naa sa iyang hawak ug dayong dayong gidunggab ang mga biktima.

Si Police Lt. Col. Ritchie A. Salva, OIC sa Malaybalay City Police Station, sa iyang taho, niingon nga ang mga biktima gidala sa Bukidnon Provincial Medical Center apan gideklara nga patay na sa wala pa nahiabot sila Julie ug Danilo Maraasin, samtang si Sofronio Tina-an ubos pa sa obserbasyon gumikan sa mga samad dinunggaban nga naangkon niini.

Sa kasamtangan, ang suspek anaa ubos sa kustodiya sa kapolisan sa dakbayan sa Malaybalay. (Diego M. Hidalgo)

3 lalaki nakuhaan og droga sa Valencia

Posted on by Diego M. Hidalgo

Adunay tulo ka lalaki ang nakuhaan og gidudahan nga droga pinaagi sa drug buy-bust operation nga gipahigayon sa hiniusang pwersa sa kapolisan managlahing lugar niadtong Pebrerp 28, 2023

Adunay tulo ka lalaki ang nakuhaan og gidudahan nga droga pinaagi sa drug buy-bust operation nga gipahigayon sa hiniusang pwersa sa kapolisan managlahing lugar niadtong Pebrerp 28, 2023.

Sa report nga nahipos sa Bukidnon Police Provincial Office, ang tulo giila nga sila Morgan Miranda y Iganacio alyas “Gon”, Noraldni Radyamoda y Mangoramka alyas “Kim”, ug Jhalil Ale y Pendaton alyas “Lee”.

Si Miranda, 49, ulitawo, construction worker ug residente sa Purok 2, Barangay Bagontaas, Valencia City Bukidnon. Siya nakuhaan og 5.3 gramo sa gidudahang shabu nga adunay estimated market value nga Php 36,040.00.

Si Radyamoda, 22, ulitawo, ug residente sa Barangay Central, Kalilangan, Bukidnon. Siya nasikop sa Purok 2, Barangay Lumbo, Valencia City, Bukidnon. Nakuha gikan sa iyang posesyon ang 6 gramo sa gidudahang shabu nga adunay market value nga Php40,800.00.

Samtang si Ale, 28, newly identified, minyo, mag-uuma, ug residente sa Purok 2b North Poblacion, Maramag, Bukidnon. Siya nakorner sa Purok 2b, Barangay Lumbo, Valencia City, Bukidnon. Nasakimit gikan kaniya ang 7 gramo sa gidudahang shabu nga adunay kantidad nga Php47,600.00.

Kasong paglapas sa Section 5 & 11, Article II of R.A. 9165 ang giandam batok sa mga suspek. (Diego M. Hidalgo)

Bag-ong farm-to-market roads pormal nga gi-turnover ngadto sa 4 ka barangay sa Valencia

Posted on by Diego M. Hidalgo

Pormal nga gi-turnover ngadto sa mga residente sa upat ka barangay ang bag-ong farm-to-market roads (FMRs) nga napatuman ubos sa Support to Barangay Development Program (SBDP) sa managlahing higayon

Ang lokal nga panggamhanan nipahibalo nga ang maong mga barangay mao ang Barangay Concepcion, Laligan, Tugaya ug Guinoyuran.

Ang pag-turnover sa FMRs sa Barangay Concepcion ug Laligan gipahigayon niadtong Pebrero 17, 2023 sa Barangay Laligan Covered Court.

Samtang sa Barangay Guinoyuran Covered Court gipahigayon niadtong Pebrero 24, 2023 ang pag-turnover ngadto sa Barangay Tugaya ug Guinoyuran.

Ang maong proyekto isa ka inisyatiba sa National Government pinaagi sa Executive Order No. 70 ni kanhi presidente Rodrigo Duterte nga nagapalig-on sa pakiglambigit sa mga lokal nga pangagamhanan alang sa pagsugpo sa insurhensya pinaagi sa paghatag og saktong pagtagad sa mga panginahanglanon sa mga kabarangayan, ilabi na ang mga komunidad sa hilit nga mga dapit, sama sa pagtukod og mga proyektong pang-imprastraktura. (Diego M. Hidalgo)