DAKBAYAN SA MALAYBALAY — Gipresentar ang lain-laing award ug pasidungog nga nakab-ot sa Sangguniang Panlungsod (SP) sa Malaybalay atol sa Monthly Convocation nga gipahigayon sa buntag niadtong Disyembre 15, 2025

Sumala sa Facebook post sa city government, nakab-ot sa SP Malaybalay ang 1st Place sa City Category sa Calendar Year 2025 Excellence in Local Legislation kon EXCELL Award sa provincial level, nga gitunol niadtong Disyembre 11, 2025, sa Probinsya sa Bukidnon.  

Nadawat usab sa SP ang Rank 3 sa Regional Level sa 2025 Local Legislative Award nga gitunol sa Department of the Interior and Local Government (DILG) kauban ang Philippine Councilors League (PCL) ug Vice Mayors League of the Philippines (VMLP). Ang award gitunol atol sa 4th Quarter Continuing Local Legislative Education Program (CLLEP) ug Year-End Assembly sa Philippine Councilors League didto sa JPark Island Resort, Lapu-Lapu City, Cebu.  

Nadawat sab sa SP niadtong Disyembre 2, 2025, gikan sa Philippine League of Secretaries to the Sanggunian (PLEASES), Inc. ang pag-ila isip Regional Finalist sa Component Cities Category sa 2025 Local Legislative Award.  

Mapasalamaton ang SP nga gipangulohan ni Vice Mayor Estelito R. Marabe sa maong mga pasidungog ug mipasalig nga ipadayon ang maayong pangalagad ug pagserbisyo alang sa katawhan sa tibuok siyudad sa Malaybalay. (Omar Rashid Z. Abdullah)