VALENCIA CITY, Bukidnon – Gipahigayon buntag sa Hulyo 22, 2026 ang seremonyal nga site
blessing sa lugar nga pagatukoran sa Valencia City Good Samaritan General Hospital
(VCGSGGH) sa luyo sa Integrated Bus Terminal sa Hagkol.

Ang kalihokan gipangunahan ni Mayor Amie G. Galario uban sa mga opisyal sa lokal nga
panggamhanan, mga partner, ug mga dinapit nga bisita isip pagsugod sa pagtuman sa usa sa mga
mayor nga proyekto sa dakbayan alang sa sektor sa panglawas.
Atol sa programa, gipresentar ang plano sa pagtukod sa isa ka moderno ug komprehensibong
ospital nga gitumong sa pagpalapad sa akses sa dekalidad nga serbisyo panglawas ug pagtagbo
sa nagkadaiyang medikal nga panginahanglan sa mga residente sa Valencia City.

Matud ni kanhi Mayor ug karon City Spokesperson Jun Galario, nga una niyang gipahibalo atol
sa press conference niadtong Hulyo 20, target nga masugdan ang konstruksyon sa ospital sa
ulahing bahin sa Setyembre o sa Oktubre karong tuiga.
Gilauman nga ang pagtukod sa VCGSGGH makatabang sa pagpakunhod sa kahuot sa mga
kasamtangang pasilidad panglawas ug makapalig-on sa paghatag og mas dali, mas duol, ug mas
episyenteng serbisyo medikal alang sa mga Valenciano, ilabina sa mga nanginahanglan og
dinaliang pag-atiman. (melbmadera)