Sa matag konsultasyon, eksaminasyon ug pag-atiman, padayon nga gipaduol sa City Health
Office (CHO) sa Malaybalay City, Bukidnon ang serbisyo panglawas ngadto sa katawhan
pinaagi sa Enhanced Screening Area (ESA) sa Barangay 4 Covered Court.

Kauban ang mga personnel sa PhilHealth, naghatag ang CHO og accessible ug dekalidad nga
serbisyo atol sa Agosto 2026, nga nagpakita sa padayong paningkamot sa lokal nga
panggobyerno nga mas mapaabot sa mga residente ang gikinahanglang pag-atiman sa ilang
kahimsog.
Sumala sa kasayoran sa city government, mokabat sa 6,573 ka indibidwal ang nakadawat og
medical consultation sa maong bulan, samtang 5,604 ka laboratory examinations ang nahimo.
Adunay usab 332 ka indibidwal nga nakaagi og X-ray examination, samtang 22 ka pasyente ang
gi-refer sa ospital ug laing 22 ang gi-refer alang sa physical therapy.
Dugang pa, 242 ka indibidwal ang nakadawat og Mental Health Gap services, isip kabahin sa
pagtagad dili lamang sa pisikal kundili apil usab sa mental nga kahimsog sa mga residente.
Naghatag usab ang CHO og nagkalain-laing serbisyo sama sa oral health, immunization, family
planning, HIV/STI screening, PAP smear/VIA testing, pharmacy services ug animal bite
management, nga nakaserbisyo sa 562 ka indibidwal.
Pinaagi sa ESA, gipasiugda sa CHO nga ang maayong panglawas dili lamang usa ka serbisyo
nga pangitaon sa panahon sa panginahanglan, kondili usa ka katungod nga angay mapaduol ug
maabot sa matag lumulupyo sa Dakbayan sa Malaybalay. (melbmadera)