Ang Communist Party of the Philippines – New People’s Army – National Democratic Front (CPP-NPA-NDF) gideklarang persona non grata sa lima ka barangay sa Munisipyo sa Quezon, Bukidnon

Sumala sa Facebook page sa 89th Infantry Battalion, kini ang highlight sa kalihokan sa katawhan batok sa communist-terrorist-groups nga natigayon sa Sitio Gamot, Brgy. Sta. Felomina, Quezon, kaniadtong Agosto 22, 2025.

Napirmahan ang mga resolution gikan sa Barangay Sta. Felomina, Linabo, San Roque, Cawayan ug Minongan nga nagdeklarar sa walhong grupo nga persona non grata sa ilang dapit.

Una niini, usa ka seremonyal nga pagsunog sa mga bandera sa CPP-NPA-NDF ang natigayon.

Kini nga buhat nagtimaan sa pagdumili sa ideolohiya sa komunismo ug sa komitment alang sa malinawon nga kaugmaon.

Ang mga lider sa lima ka barangay nga sila Ferdinand A. Silvestre, Fercival A. Silvestre, Edison B. Bayadog, Reynaldo L. Montecalvo, ug Amando O. Arnado, uban sa Charlie Company nga gipangulohan ni Captain Sidrac C. Alicog, nagpakita sa ilang bug-os nga suporta sa tibuok kalihokan.

Dugang pa, anaa usab ang Municipal Tribal Chieftain Datu Bebot Mandanuay ug ang Brgy. IPMR Datu Sante Panduma, nga nagpalig-on sa lapad nga suporta sa komunidad ug tribo alang sa maong kalihokan.

Matud ni Captain Alicog nga ang maong kalihokan usa ka pagpamatuod sa determinasyon sa ilang komunidad nga molambo.

Sa ilang hiniusang pamahayag, nagkanayon nga “ang pagkahiusa ug kalinaw tinuod nga makab-ot pinaagi sa tinuod nga pakig-istorya, matinud-anong pagpasaylo, ug kolektibong paningkamot gikan sa tanan nilang myembro.” (melbmadera)