Gipahibalo sa lokal nga pangagamhanan sa Valencia City nga mas pahugtan pa ang pagpatuman sa Curfew for Minors isip kabahin sa komprehensibong paningkamot sa pagpanalipod sa kaayohan sa kabatan-onan ug sa pagpalig-on sa kahapsay ug kalinaw sa komunidad

Gipasabot nga ang maong lakang dili lamang pagpatuman sa balaod subay sa City Ordinance No. 119-2024, kondili usa usab ka developmental nga inisyatiba nga nagtumong sa paggiya sa mga batan-on sa husto nga pamatasan ug sa paglikay kanila sa peligro nga mga kahimtangan.

Gipasiugda usab sa kagamhanan nga ang responsibilidad sa pag-atiman ug paggiya sa mga menor de edad usa ka hiniusang buluhaton sa gobyerno, ginikanan, ug komunidad. Busa, gi-awhag ang mga ginikanan ug magbalantay nga aktibong magmonitor sa ilang mga anak, ilabi na sa mga oras nga gidili ang ilang paggawas.

Lakip sa mga lakang nga ipatuman mao ang mas hugot nga koordinasyon sa mga barangay, kapulisan, ug ubang concerned offices aron masiguro nga ang curfew ipatuman sa makatawhan ug makatarunganong paagi, nga nagahatag og prayoridad sa proteksyon, pagpanudlo, ug rehabilitasyon sa kabatan-onan.

Naglaum ang lokal nga pangagamhanan ubos sa liderato ni Mayor Amie Galario, kauban ang 10th Sangguniang Panlungsod sa pagpangulo ni Vice Mayor Greizl Galario-Fernandez, nga pinaagi sa hiniusang paningkamot sa tanang sektor, mapalig-on ang usa ka lig-on, disiplinado, ug malungtarong komunidad diin ang kabatan-onan adunay hapsay ug luwas nga palibot alang sa ilang pagtubo ug paglambo.(pr)