Aron mapauswag ang modernisasyon ug industriyalisasyon sa agricultural value chains sa Northern Mindanao, mitugyan ang Department of Agriculture – Regional Field Office 10 (DA–RFO 10), pinaagi sa Organic Agriculture Program, og mga hauling vehicle nga nagkantidad og P1.44 milyon matag usa ngadto sa Malaybalay City Organic Farmers Association (MACOFA) ug Tatak Organic Kauswagan Farmers Association (TOKFA)

Ang turnover gipahigayon kaniadtong Enero 13, 2026 sa Northern Mindanao Agricultural Crops and Livestock Research Complex (NMACLRC) sa Dalwangan, Malaybalay City, Bukidnon.

Sumala sa press release sa DA RFO 10, ang maong interbensyon gipondohan ubos sa Provision of Agricultural Equipment and Facilities nga gilakip sa National Organic Agriculture Program (PAEF–NOAP). Tumong niini ang pagpalig-on sa organikong agrikultura pinaagi sa pagpaayo sa produksiyon, post-harvest facilities, logistics, market access, ug capacity-building sa mga organisasyon sa mag-uuma.

Ang hauling vehicle adunay 15-pasahero nga kapasidad ug 1,655-kilogram payload, nga gilaumang mopauswag sa transport efficiency, makapakunhod sa post-harvest losses, makapausbaw sa competitiveness sa organic farm products, ug makadugang sa kita sa mga mag-uuma aron mapalig-on ang agri-based nga negosyo sa rehiyon.

Gipahayag usab nga ang inisyatiba nagpalig-on sa pasalig sa administrasyon sa Presidente sa pagsuporta sa mga organisadong mag-uuma ug sa pagpalambo sa organikong agrikultura isip malungtarong dalan padulong sa seguridad sa pagkaon ug pagtubo sa ekonomiya sa kabaryohan sa Northern Mindanao.(melbmadera)