Ang Department of the Interior and Local Government (DILG) Bukidnon Provincial Office ug mga buhatan niini sa mga dakbayan ug munisipyo mipatuman sa Compressed 4-Day Work Week, samtang ang Local Government Unit (LGU) sa Valencia City mipatuman sa flexible work arrangement

Sumala sa pahibalo nga gipaskil sa Facebook page sa DILG Bukidnon, ang publiko gipahibalo nga ang trabaho sa ilang buhatan Lunes hangtod Huwebes lang, subay sa gi-implementa sa national government ug epektibo sugod Marso 9, 2026.

Ang lakang gisunod base sa DILG Circular No. 2026-005 ug Memorandum Circular No. 2026 gikan sa Opisina sa Presidente. Tumong niini ang pagpalambo sa operational efficiency samtang nagsiguro sa padayon nga paghatud sa dekalidad nga serbisyo publiko.

Sa laing bahin, ang City Government sa Valencia mipatuman usab sa flexible work arrangement pinaagi sa Executive Order ni Mayor Amie Galario, isip suporta sa energy conservation initiative sa national government.

Sa bag-ong arrangement, ang Onsite Work Days mao ang Lunes hangtod Huwebes, samtang ang Offsite Work Day mao ang Biyernes (working hours: 8:00 AM – 5:00 PM).

Gipaneguro sa City Government nga ang mga opisina nga naghatud og kritikal nga serbisyo publiko magpabilin nga hingpit nga magamit. Lakip niini ang City Health Office (CHO), Disaster Risk Reduction and Management Office (DRRMO), Public Safety and Emergency Response Units (PSERU), Traffic Management ug Law Enforcement Units, ug uban pang buhatan nga nagkinahanglan og padayon nga operasyon.

Giingon sa LGU nga ang serbisyo publiko magpadayon nga walay pagkabalda ubos niining bag-ong work arrangement. (melbmadera)