Mikabat sa P1.3 milyon nga mga proyektong panginabuhian ang gipanghatag ngadto sa mga benepisaryo sa mga lungsod sa Don Carlos ug Dangcagan aron suportahan ang ilang panginabuhi ug mapalambo ang kahimtang sa ilang mga pamilya

Ang mga ayuda gipahimuslan sa tulo ka asosasyon, 20 ka ginikanan sa mga batang trabahador,
ug 10 ka mga indibiduwal nga adunay ubos nga kita.
Gipangunahan sa Department of Labor and Employment (DOLE)–Bukidnon Provincial Field
Office, sa pakigtambayayong sa Kaanib Foundation Inc., ang turnover sa mga livelihood projects
niadtong Hunyo 1, 2026.
Lakip sa mga benepisyaryong asosasyon ang Sinangawan Organization nga nakadawat og
consumer store project nga nagkantidad og P250,000; Mauswagon Golden Harvest Association
nga nakadawat og agricultural supply project nga nagkantidad og P200,000; ug West Liner
Association nga nakadawat og motor spare parts project nga adunay kantidad nga P200,000.
Gitugyan usab ang 20 ka starter kits ngadto sa 20 ka ginikanan nga nalista ubos sa child labor
profiling program. Ang matag benepisyaryo nakadawat og proyekto nga nagkantidad og
P20,000, lakip ang rice retailing, sari-sari store, goat raising, ug snack bar ventures.
Samtang, napulo ka mga low-income earners ang nakadawat og lain-laing livelihood projects
nga nagkantidad og P25,000 matag usa. Lakip niini ang Rice Retailing Project, Banana Chips
Production and Marketing Project, Corn Production Project, ug Sari-Sari Store Project.
Ang maong inisyatiba kabahin sa padayon nga paningkamot sa DOLE sa paghatag og mga
oportunidad sa panginabuhi ug pagpalig-on sa ekonomikanhong kahimtang sa mga komunidad
pinaagi sa mga programang nagmugna og dugang nga tinubdan sa kita alang sa mga
benepisaryo. (melbmadera)